婚禮金器小百科　龍鳳鈪點分左右？

金器是一貫婚禮上新娘子必備的飾物，由頭到頸、手，戴得愈多愈有排場。不過，要如何配搭金器先戴得好睇？最熱門的金器又有哪幾款？美意珠寶金器租賃的鄧淑恩(Hody)講解婚禮金器小知識，無論租賃金器或是買金器都可以參考。

1. 頸鏈

頸鏈主要分為2類：一類為金豬牌，另一類為花鏈。Hody表示，

10個來租金器的客人，9個會租金豬牌。

傳統的長輩都喜歡新娘戴上金豬牌，為男家開枝散葉。金豬牌當中，以「四代同堂」最為搶手，「四代同堂」是指3隻大金豬連同一層細金豬，有兒孫滿堂的意義。

▲ Hody表示，金豬牌最搶手，上圖為「兩代同堂」金豬牌，有一隻大豬及一層小豬。(黃建輝 攝)

Hody建議，金豬牌夠大夠搶眼，適合配搭任何裙掛，而不會與裙掛上的細節造成眼花繚亂的感覺。

而花鏈有花開富貴的象徵，比較適合穿低胸晚裝時配戴，能夠突出花鏈的細節。不過，花鏈的細節較多，所以手工費較高。

2. 龍鳳鈪

新娘出嫁，手上的龍鳳鈪必不可少。不過無論龍鳳鈪數量多與少，一定不可戴錯。

Hody叮囑各位新娘記得「左龍右鳳」，左手戴龍右手戴鳳，不可調轉，戴之前記得睇清楚。

另外，龍鳳鈪有粗幼之分，配戴時先戴最幼身的龍鳳鈪，最粗身的龍鳳鈪則戴在最上方，按龍鳳鈪的粗幼排序。

龍鳳鈪有分尺寸，買或租之前最好親身試戴，以免龍鳳鈪過緊或過鬆。

3. 特色金器

以為金器等於老土俗氣？其實現時金器的花款愈出愈多，包括有后冠、手背鏈，愈出愈潮。

Hody表示，金手背鏈亦很受客人歡迎，

不像龍鳳鈪般有尺寸之分，手背鏈任何女士都戴得落，而且整個手背都有飾物點綴就不覺得「空盪盪」。

▲ 金手背鏈亦相當受女士歡迎，因款式較新潮。(相片來源：美意珠寶網站截圖)

不愛傳統款式的女士，又多一款新選擇。

4. 中式婚禮VS西式婚禮

雖有新人喜歡傳統中式婚禮，但愈來愈多新人主張舉辦西式婚禮，行西式婚禮是否需要準備金器？

Hody表示，不論中、西式婚禮，只要婚禮上有敬茶環節，就需要金器，就算穿婚紗也可戴金器。

5. 金器會變色？

有新娘曾表示，上幾代長輩留給她結婚時戴的金器變色、暗啞無光，擔心如果自己買金器時保養不當，亦會令金器變色。

Hody解釋，金器會變色的主因在於金器的純度，以往的金器純度多數為「2條9」、「3條9」，金器內可能摻入了其他物質，例如銅等，所以會較容易變色。但現時的金器多以純度最高的「4條9」製成，所以不用太擔心變色的問題。

▲ 以「4條9」黃金打造的龍鳳鈪，於鈪內會印有「999.9」的印記以及火號。(黃建輝 攝)

6. 買飾金可保值？

有部分新人認為，結婚的飾金可以保值，所以傾向買金器。而Hody分析，由於以往的投資工具不多，飾金是其中一種常用的投資工具來保值。

不過，現時有更多的投資工具可供選擇，而飾金一買一賣會蝕手工費，所以買飾金可保值的想法已經落伍。

【其他熱話】結婚撐場面之選　實測淘寶$79「金豬」有幾真？

【其他熱話】2017年婚嫁好日子 邊個月份最多吉日？

【其他熱話】結婚派嫁女餅　邊度買餅卡最着數？